Bache bene venies

[Mayra faiseuse de Couleur]

Bache bene venies gratus et optatus
per quem noster animus fit letificatus

Istud vinum bonum vinum
vinum generosum
reddit virum curialem
probum animosum

Iste cyphus concavus de bono mero profluus
siquis bibit sepius satur fit et ebrius

Hec sunt vasa regia quibus spoliatur
ierusalem et regalis babilon ditatur

Ex hoc cypho conscii bibent sui domini
bibent sui socii bibent et amici

Bachus forte superans pectora virorum
in amorem concitat animos eorum

Bachus sepe visitans mulierum genus
facit eas subditas tibi o tu venus

Bachus venas penetrans calido liquore
facit eas igneas veneris ardore

Bachus lenis leniens curas et dolores
confert iocum gaudia risus et amores

Bachus mentem femme solet hic lenire
cogit eam citius viro consentire

Aqua prorsus coitum nequit impetrare
bachus illam facile solet expugnare

Bachus numen faciens hominem iocundum
reddit eum pariter doctum et facundum

Bache deus inclite omnes hic astantes
leti sumus munera tua prelibantes

Omnes tibi canimus maxima preconia
te laudantes merito tempora per omnia


Carmina Burana N° 200, Chant du XIII